Veðurfræðingurinn Einar Sveinbjörnsson segir á Facebook-síðu sinni ástæðu til að fylgjast grannt með öflugri lægð sem gæti nálgast Ísland um miðja viku. Nýjustu spár gera ráð fyrir meiri dýpkun hennar en fyrri spár höfðu sýnt.
Einar greinir frá þessu í færslu á samfélagsmiðlum og birtir jafnframt myndir sem sýna áætlaða þróun og feril lægðarinnar. Samkvæmt honum sýnir nýjasta spá Evrópsku reiknimiðstöðvarinnar lægð sem kemur frá austanverðum Bandaríkjunum og sveigir norðaustur yfir Atlantshafið með stefnu á Ísland.
„Breyting frá spám gærdagsins er sú að dýpkunin er meiri en áður var gert ráð fyrir. Síðdegis á miðvikudag má þannig töluna 936 hPa skammt undan Hornafirði,“ skrifar Einar.
Hann segir svo djúpar lægðir vera fáséðar hér við land og rifjar upp sögulegt veður í því samhengi.
„Í október er aðeins einu sinni vitað til þess að loftvog hafi fallið niður fyrir 940 hPa í mælingu. Það gerðist 1963 þann 19. 938,4 hPa á Stórhöfða. Veðrið þá var víst ógurlegt.“
Einar segir skýringuna á mikilli dýpkun lægðarinnar meðal annars vera þá að hún gleypi aðra og minni lægð. Við það magnist hringhreyfingin og dýpkunin verði enn ákafari.
„Sjálf dýpkunin reiknast 44 hPa frá kl. 12 á morgun, þriðjudag, til kl. 12 á miðvikudag,“ segir Einar.
Þetta er breyting frá fyrri spám. Í keyrslum frá deginum áður hafi aðallægðin ýtt þeirri minni á undan sér og lægðaorkan því ekki nýst að fullu.
Einar segir mikilvægt að fylgjast mjög náið með þróuninni.
„Grannt þarf að fylgjast með þessari þróun næstu tvo til þrjá sólarhringa. Mjög djúpar lægðir eins og sú sem nú er í pípunum valda langoftast óskunda hér og stundum verulegum vandræðum og með eignatjóni.“
Enn er þó töluverð óvissa um nákvæman feril og styrk lægðarinnar. Einar slær því ákveðinn varnagla við spána og bendir á að margt geti breyst áður en hún nálgast landið.
„En það er enn langur vegur frá Atlanta til Akureyrar!“
Athugasemdir