Það verður sannkölluð nostalgíustund á Borgarbókasafninu síðar í vikunni þegar þrír reynslumiklir tónlistarmenn leiða saman hesta sína og heiðra Gunnar Þórðarson og ógleymanleg lög hans.
Ragnheiður Gröndal, söngkona og píanóleikari, Guðmundur Pétursson gítarleikari og Leifur Gunnarsson kontrabassaleikari ætla að kafa ofan í lagasjóð Gunnars á tvennum hádegistónleikum. Fyrri tónleikarnir verða í Gerðubergi föstudaginn 16. október klukkan 12:15 og þeir síðari í Spönginni laugardaginn 17. október klukkan 13:15.
Það ættu flestir að finna eitthvað kunnuglegt á efnisskránni enda skildi Gunnar eftir sig ótrúlegan fjölda laga. Talið er að eftir hann liggi yfir 500 lög og þar á meðal eru perlur á borð við Bláu augun þín, Þú og ég og Vetrarsól.
Gunnar var einn fjölhæfasti tónlistarmaður þjóðarinnar og lét sér ekki nægja að semja lög. Hann kom einnig fram sem söngvari og gítarleikari og starfaði auk þess sem upptökustjóri.
Tónleikarnir eru hluti af tónleikaröðinni Dægurflugur í hádeginu sem Borgarbókasafnið stendur fyrir. Röðin hóf göngu sína árið 2014 undir nafninu Jazz í hádeginu en Leifur Gunnarsson hefur verið listrænn stjórnandi hennar frá upphafi. Fjölmargt þekkt tónlistarfólk hefur komið þar fram í gegnum árin.
Það kostar ekkert inn á tónleikana og því er bara að mæta tímanlega, enda gildir gamla góða reglan: fyrst koma, fyrst fá, á meðan húsrúm leyfir.
Athugasemdir