Kaylub Giamanco, 36 ára smiður frá Oregon í Bandaríkjunum, er hylltur sem hetja eftir að hann stöðvaði 16 ára árásarmann sem réðst inn í grunnskóla þar sem tvö af börnum hans voru stödd.
Giamanco var í hádegishléi nærri Silver Rail-grunnskólanum í Bend á föstudaginn þegar hann heyrði skothvelli. Hann greip skotvopn sitt og hljóp inn í skólann til að hjálpa.
Fjórir létust í árásinni, þar af þrír drengir, fimm, átta og ellefu ára, og 25 ára kennslukona. Tveir til viðbótar særðust.
Árásarmaðurinn, John Griffin, 16 ára fyrrverandi nemandi skólans, hafði skotið á bíl fyrir utan skólann og síðan á inngangshurðina til að komast inn í bygginguna. Giamanco mætti honum í sérkennslustofu og skaut hann til bana.
Donald Trump Bandaríkjaforseti hrósaði Giamanco fyrir framgöngu sína.
„Hann er mikil hetja. Hann tók málin í sínar hendur,“ sagði forsetinn.
Bróðir Giamanco, Kyle, sagði NBC News að hann vildi ekki veita viðtöl og fyndi til sektarkenndar yfir því að hafa ekki getað bjargað fleiri. Móðir hans, Kenda Freeman, sagðist hins vegar vera afar stolt af syni sínum.
Tina Kotek, ríkisstjóri Oregon, beindi einnig orðum sínum til Giamanco á blaðamannafundi.
„Það sem þú gerðir fylgir mikil tilfinningaleg byrði. Ég vil að þú vitir að ég hugsa líka til þín í dag,“ sagði hún.
Móðir árásarmannsins, Shauntai Nickerson, tjáði sig einnig um harmleikinn við The New York Times. Hún grét þegar hún ræddi við blaðamenn.
„Mér þykir þetta svo leitt. Ég hefði stöðvað þetta ef ég hefði getað. Ég hélt að hann væri góður drengur,“ sagði hún.
Athugasemdir