María Lilja Ingveldar-Þrastardóttir Kemp segir að ráðningarsambandi hennar við Samstöðina hafi verið rift þegar hún hugðist snúa aftur úr veikindaleyfi. Hún hyggst nú hefja eigið hlaðvarp og biður fólk um fjárstuðning við nýtt upphaf.
María Lilja segir í færslu á Facebook að henni hafi verið sagt upp störfum hjá Samstöðinni þegar hún hugðist snúa aftur úr veikindaleyfi. Hún segir ákvörðunina hafa verið mikið áfall og að hún standi nú frammi fyrir fjárhagslegum erfiðleikum.
„Án þess að fara neitt sérstaklega í saumana á því hér þá var ég rekin af Samstöðinni þegar ég hugðist snúa aftur úr veikindaleyfi. Öllu heldur, ráðningarsambandi mínu var rift, á afar hæpnum grundvelli svo það sé sagt,“ skrifar María Lilja.
Hún segir Blaðamannafélag Íslands og lögmann félagsins hafa stutt sig í málinu og þakkar þeim fyrir stuðninginn.
Að sögn Maríu Lilju hyggst Samstöðin ekki greiða henni lögbundinn uppsagnarfrest og hafi jafnframt hafnað beiðnum hennar um að fá að starfa út frestinn. Hún segir þetta hafa áhrif á rétt sinn til atvinnuleysisbóta og að henni hafi ekki tekist að finna nýja vinnu þrátt fyrir ítrekaðar tilraunir.
„Ég fæ ekki svo mikið sem viðtal og þá skiptir engu hvaða vinnu ég sæki um,“ skrifar hún.
Hún vísar jafnframt til þess að hún sé umdeild og að yfir höfði hennar hangi alvarleg kæra. Hún segir sig sæta lögreglurannsókn vegna meintra tengsla við hryðjuverkasamtök, mútur og landráð.
„Hver vill ráða umdeilda fertuga konu sem hefur hangandi yfir höfði sér alvarlega kæru, sætir lögreglurannsókn fyrir tengsl við hryðjuverkasamtök, mútur og allskonar landráð.
Fucked. Cancelled,“ skrifar María Lilja og á þá við kæru á hendur henni vegna fjárstuðnings við Palestínumenn en hún fór ásamt fleiri konum til Egyptalands til að greiða fyrir heimkomu Gaza-búa sem höfðu þá þegar fengið dvalarleyfi á grundvelli fjölskyldusameiningar. Þannig tókst þeim að bjarga þó nokkrum fjölskyldum frá hryllingnum á Gaza.
Hefur fundið fyrir auknum fjárhagsáhyggjum
María Lilja segir stöðuna hafa reynst sér erfið, ekki síst þar sem hún sé einstæð móðir á leigumarkaði.
„Sem einstæð móðir á leigumarkaði hef ég svosem lent í ýmsu í gegnum tíðina en viðurkenni að eftir því sem liðið hefur á mánuðinn hefur hnúturinn í maganum stækkað hraðar og afkomuóttinn orðið áþreifanlegri en nokkru sinni,“ skrifar hún.
Hún segist þó ekki ætla að gefast upp. Hvatningarskilaboð frá fólki sem hafi saknað hennar í dagskrárgerð hafi meðal annars orðið til þess að hún ákvað að hefja nýtt verkefni.
„Ég hef ákveðið að svara kallinu og fara af stað með eigið hlaðvarp sem að vonum vex og verður að einhverju stærra.“
María Lilja vonast til að fyrsti þátturinn verði tekinn upp og birtur fyrir lok næstu viku, að því gefnu að allt gangi að óskum.
Biður um fjárstuðning við nýtt upphaf
Í færslunni biður María Lilja fólk sem hefur tök á því að styrkja hana fjárhagslega á meðan hún kemur nýja verkefninu af stað.
„Mér þykir það ekki auðvelt að betla peninga fyrir sjálfa mig en eins og staðan er fyrir þessi mánaðarmót hef ég ekki annarra kosta völ,“ skrifar hún.
Hægt er að styrkja hana í gegnum vefsíðuna Buy Me a Coffee eða með millifærslu á reikning hennar: 2200 26 727727 kt. 0109863039.
María Lilja segir jafnframt að þeir sem hafi áhuga á að ráða hana til starfa geti haft samband við sig.
Hún lýkur færslunni á þakklæti til þeirra sem hafa sýnt henni stuðning og hvatningu undanfarið.
„Áfram veginn og þúsund sinnum takk!“
Athugasemdir