Karlmaður á þrítugsaldri hefur verið ákærður af lögreglustjóranum á Norðurlandi eystra fyrir alvarleg brot á lögum um ávana- og fíkniefni sem og peningaþvætti. Málið verður þingfest í þann 10. júní næstkomandi.

Samkvæmt ákæru er manninum gefið að sök að hafa mánudaginn 17. mars 2025 haft í vörslum sínum á dvalarstað sínum á Akureyri samtals 42,49 grömm af kókaíni og 571,16 grömm af maríhúana sem hafi verið ætluð til sölu.

Þá er hann einnig ákærður fyrir peningaþvætti með því að hafa aflað sér 120 þúsund króna ávinnings með sölu fíkniefna eða annarri refsiverðri starfsemi á tímabili áður en hann var handtekinn í mars 2025.

Í ákærunni er þess krafist að hinn ákærði verði dæmdur til refsingar, greiðslu sakarkostnaðar og að fíkniefni og önnur haldlögð efni verði gerð upptæk. Þá er einnig krafist upptöku á meintum ávinningi brotastarfseminnar að fjárhæð 120 þúsund krónur til ríkissjóðs.