Mikið fár hefur verið á síðum Morgunblaðsins og mbl.is undanfarið vegna þess að Þorgerður Katrín Gunnarsdóttir utanríkisráðherra var sögð hafa haldið því fram í viðtali við visir.is að Rob Jetten, forsætisráðherra Belgíu, hefði sagt Þorgerði að mögulegt væri að Íslendingingar fengju undanþágu frá fiskiveiðistjórnunarkerfi Evrópusambandsins ef til aðildar kæmi. Nú er komið á daginn að blaðamaður Vísis hafði misskilið Þorgerði hrapallega og Jetten hafði ekki átt samtal við hana um málefnið.
Mogginn endurtók ranghermi Vísis ítrekað og meðal annars í aðalfrétt á forsíðu. Þá var Gunnar Bragi Sveinsson, fyrrverandi utanríkisráðherra og einn Klausturmanna, kallaður til viðtals þar sem hann taldi meint ummæli vera ráðherranum til skammar. Í gær kom svo hið rétta á daginn og Vísir baðst auðmjúklega afsökunar á mistökum sínum. Mogginn þagði um málið í rúman sólarhring eða þar til í dag þegar langloka birtist frá Andrési Magnússyni, deildarstjóra minningargreina og ritstjórnarfulltrúa á Mogganum. Ekkert bólaði á afsökunarbeiðni Andrésar vegna óhróðursins en hann fjargviðraðist yfir mistökum Vísis og 13 daga þögn Þorgerðar Katrínar sem Andrés taldi allt eins vera brot á siðareglum ráðherra.
Sú var tíðin að ritstjórn Morgunblaðsins studdist við siðareglur og baðst afsökunar þegar það fór út af sporinu. Nú blasir við forherðingin og enginn vilji er til leiðréttinga ...
