Sex Íslendingar, fimm karlar og ein kona, eru ákærð fyrir að hafa haldið manni föngnum á heimili hans í Reykholti í Bláskógabyggð í apríl 2024, beitt hann harkalegu ofbeldi og haft af honum fé og er málið nú rekið í Héraðsdómi Suðurlands
Mikið magn hljóðupptaka liggur fyrir í málinu. Sími Andra Más Mortensen Birgissonar tók sjálfkrafa upp símtöl auk hljóðs þegar hringt var úr símanum, jafnvel þótt símtölum væri ekki svarað.
Á einni upptökunni heyrist Andri Már hóta brotaþola. „Vertu kyrr, ekki fokking hreyfa þig eða ég sparka meira í þig,“ segir hann. Síðar ræðir hann við Ingunni Rut Sigurðardóttur, unnustu sína, og biður hana um að útvega bíl.
Andri lýsir þar jafnframt ótta við að missa stjórn á sér. „Ef ég fer í blackout þá drep ég hann,“ heyrist hann segja.
Á öðrum upptökum ræðir Andri um brottför brotaþola úr landi. Samkvæmt ákæru fylgdu Andri, bróðir hans og Ingunn brotaþola á Keflavíkurflugvöll, þaðan sem hann flaug til Parísar og síðar Möltu. Í samtali við mann sem virðist vera tengdafaðir hans segir Andri að ekki sé hægt að sanna neitt þar sem brotaþoli sé farinn úr landi.
Fleiri upptökur benda til þess að Andri hafi rætt möguleikann á frekari brotum. Í samtali við Ingunni biður hann um ódýran snjallsíma og vísar til þess að þau hafi rafræn skilríki brotaþola.
„Við getum notfært okkur fokking kennileitið hans. Við getum verið hann,“ heyrist Andri segja.
Gert er ráð fyrir að allir ákærðu ljúki skýrslugjöf í dag.
