Fjórir menn hafa verið dæmdir í umfangsmiklu fíkniefnamáli sem Héraðsdómur dæmdi í fyrir stuttu.
Sakborningarnir voru þeir Árni Khanh Minh Dao, Daníel Ramadhan Sigurgeirsson, Davíð Viet Quoc Davíðsson og John Minh Tuan Dang. Samkvæmt ákæru höfðu þeir staðið saman að umfangsmikilli dreifingu fíkniefna um ótilgreindan tíma. Þeir voru sakaðir um að hafa í félagi útvegað, tekið við, varðveitt, pakkað, dreift og selt margvísleg fíkniefni.
Við húsleitir í Reykjavík og Kópavogi, auk leitar í bifreið sem tengdist málinu, lagði lögregla hald á mikið magn fíkniefna og búnaðar sem talinn var tengjast starfseminni. Meðal þess sem fannst voru rúm 15,9 kíló af maríhúana, yfir sex kíló af kannabisblönduðu súkkulaði, hundruð kannabisbrjóstsykra og gúmmíbangsa, auk amfetamíns, ketamíns, kókaíns, MDMA, LSD og metamfetamíns. Þá fundust einnig kannabisvökvar, lyfjahylki með kannabisefnum, sveppir og fjöldi taflna af óþekktri gerð.
Lögregla lagði jafnframt hald á fjármuni í íslenskum krónum og erlendum gjaldmiðlum, auk búnaðar sem tengdist fíkniefnaframleiðslu og dreifingu. Þar á meðal voru lofttæmingarvélar, vogir, prentarar, límmiðar, pökkunarbúnaður, vélar til að vefja kannabisvindlinga, öryggismyndavélakerfi og fartölvur. Einnig fundust dagbækur með skuldalistum og upplýsingum um heildsöluviðskipti.
Þyngstan dóm hlaut Árni Khanh Minh Dao sem var dæmdur í fjögurra og hálfs árs fangelsi.
Davíð Viet Quoc Davíðsson var dæmdur í þriggja ára og fjögurra mánaða fangelsi.
Daníel Ramadhan Sigurgeirsson var dæmdur í 18 mánaða fangelsi. Fullnustu 15 mánaða var þó frestað skilorðsbundið til þriggja ára, að því gefnu að hann haldi almenn skilorð hegningarlaga. John Minh Tuan Dang hlaut 20 mánaða fangelsisdóm, en 17 mánuðum var frestað með sambærilegum skilorðsskilyrðum.
Í dóminum var jafnframt kveðið á um upptöku allra fíkniefna, fjármunanna og búnaðarins sem lögregla lagði hald á við rannsókn málsins.
