Árni Sigurðsson, aðstoðarforstjóri JBT Marel, var tekjuhæsti Íslendingurinn árið 2025 samkvæmt úttekt Frjálsrar verslunar. Þetta er annað árið í röð sem Árni trónir á toppi listans.
Samkvæmt útsvarsskyldum tekjum var Árni með ríflega 46 milljónir króna á mánuði að meðaltali á síðasta ári. Til samanburðar námu mánaðartekjur hans rúmlega 40 milljónum króna árið 2024.
Tveir aðrir einstaklingar í úttektinni voru með útsvarsskyldar tekjur yfir 30 milljónum króna á mánuði.
Eldur Ólafsson, stofnandi og forstjóri Amaroq Minerals, var næstur á listanum með 39,5 milljónir króna á mánuði. Gunnar Guðlaugsson, forstjóri Norðuráls, fylgdi þar á eftir með 33,5 milljónir króna á mánuði.
Í umfjöllun Frjálsrar verslunar er sérstaklega tekið fram að tölurnar byggist á útsvarsskyldum tekjum einstaklinganna á árinu 2025. Þær þurfi því ekki að endurspegla föst laun þeirra eða reglulegar mánaðarlegar launagreiðslur.
