Auglýsing frá veitingastaðnum Kebab Sara vakti mikla athygli á samfélagsmiðlinum TikTok í síðustu viku en í auglýsingunni sjást tveir menn slást fyrir utan veitingastaðinn.
Í auglýsingunni hefur starfsmanni Kebab Sara verið stafrænt bætt inn í myndband af tveimur mönnum sem slógust fyrr á árinu fyrir utan veitingastaðinn í Mjóddinni. Upprunalega myndbandið var tekið innan úr bíl sem lagt hafði verið fyrir utan veitingastaðinn. Í útgáfu Kebab Sara biður starfsmaðurinn mennina um að hætta að slást vegna þess að það sé til nóg af kebab fyrir alla því að veitingastaðurinn sé opinn allan sólarhringinn.
Mannlíf sendi fyrirspurn á Kebab Sara til að spyrja hvort veitingastaðurinn hefði fengið leyfi fyrir notkun myndbandsins og af hverju ákveðið hefði verið að nota slagsmálamyndband til að auglýsa mat. Þeirri fyrirspurn hefur ekki verið svarað og var auglýsingunni eytt af TikTok stuttu eftir að fyrirspurnin var send.
Í athugasemdakerfinu við hið eydda myndband gerðu margir notendur athugasemdir við auglýsinguna og þá kvartaði maðurinn sem upphaflega birti myndbandið undan því að Kebab Sara hefði ekki fengið leyfi til að nota myndbandið.
