Blaðamaður á Morgunblaðinu kýldi landsfundargest Sjálfstæðisflokksins á Pedersen-svítunni á föstudagskvöldinu.
Vísir segir frá því að Hermann Nökkvi Gunnarsson, blaðamaður á Morgunblaðinu hafi lent í rifrildum við Þorleif Hallbjörn Ingólfsson sem enduðu á því að Hermann gaf Þorleifi kjaftshögg. Handalögmálin áttu sér stað á Pedersen-svítunni á föstudagskvöldið en báðir voru þeir gestir á landsfundi Sjálfstæðisflokksins sem haldinn var um helgina í Laugardalshöllinni. Ásamt því að vera blaðamaður Morgunblaðsins er hann einnig framkvæmdastjóri SUS.
Samkvæmt Vísi var Hermann Nökkvi stuðningsmaður Guðrúnar Hafsteinsdóttur, sem sigraði Áslaugu Örnu Sigurbjörnsdóttur í kosningu um formannssæti flokksins að spjalla við Þorleif, sem studdi Áslaugu en hann er varaformaður Félags Ungra Sjálfstæðismanna í Ísafjarðarbæ. Voru þeir að ræða þær stöllur en Þorleifur sakaði Hermann um að vera undirróðursmann fyrir Guðrúnu. Hermann virðist ekki hafa getað fært rök fyrir hinu gagnstæða og lét því hnefana tala.
Fram kemur í frétt Vísis að Þorleifi þyki málið ekki vera fréttaefni og segir þá hafa verið félaga fyrir helgi og séu það enn. Viðurkennir hann þó að æsingur hafi verið í mönnum á þessu augnabliki. Daginn eftir sættust þeir félagar og fóru saman í Herragarðinn þar sem Hermann Nökkvi keypti nýja skyrtu á Þorleif.
„Ég vildi ekki þurfa að mæta í rúllukragapeysu á landsfundinn. Þetta er gæðavandamál hjá okkur og ekkert stórmál. Við Vestfirðingar getum nú tekið á móti einhverjum höggum. En það eru allir léttir og við fengum okkur bjór saman og skáluðum,“ sagði Þorleifur við Vísi.
