Lögreglan á höfuðborgarsvæðinu hafði í nógu að snúast frá klukkan 17:00 síðdegis í gær til klukkan 05:00 í morgun en alls voru 86 mál bókuð í kerfum embættisins á tímabilinu. Auk þeirra verkefna sem hér eru nefnd sinnti lögregla almennu eftirliti, aðstoðarbeiðnum og kærði nokkra ökumenn fyrir umferðarlagabrot.

Tveir einstaklingar voru handteknir í Reykjavík vegna gruns um kannabisræktun. Þá var eftirlýstur maður handtekinn í miðborginni og vistaður í fangaklefa.

Ölvaður maður var kærður fyrir brot á fjarskiptalögum eftir að hafa ítrekað truflað störf neyðarlínunnar með símtölum síðasta sólarhringinn.

Lögreglu barst einnig tilkynning um aðila sem hafði farið í óleyfi inn á læst bílaplan þar sem hann lýsti inn í bifreiðar. Viðkomandi var sagður í annarlegu ástandi og neitaði að gera grein fyrir sér. Hann var vistaður í fangaklefa.

Tvö mál komu upp þar sem gestir veittust að dyravörðum. Í öðru tilvikinu var tilkynnt um ölvaðan mann sem lét ófriðlega gagnvart dyravörðum en bæði málin voru leyst á vettvangi án frekari afskipta.

Tilkynnt var um reyk í húsnæði þar sem greiðlega gekk að slökkva eldinn og tókst að koma í veg fyrir frekara tjón.

Þá bárust tilkynningar um þjófnað úr tveimur verslunum og voru bæði málin afgreidd á vettvangi.

Tvö umferðarslys voru einnig tilkynnt til lögreglu. Í öðru þeirra flúði ökumaður vettvang eftir árekstur og hafði lögregla ekki upp á viðkomandi þegar síðast var vitað. Í hinu slysinu datt ökumaður rafhlaupahjóls og slasaðist.