Glæsilegt einbýlishús við Baughús 4 í Grafarvogi er komið á sölu með ásett verð upp á 208,5 milljónir króna. Húsið var byggt árið 1990 og er hannað af arkitektinum Kjartani Sveinssyni. Það hefur verið í eigu sömu fjölskyldu frá upphafi og samkvæmt upplýsingum úr sölulýsingu var eigandinn, sem er byggingameistari, sjálfur ábyrgur fyrir byggingu þess.
Samkvæmt skráningu HMS er húsið alls 245,2 fermetrar að stærð, þar af er tvöfaldur bílskúr 47,5 fermetrar. Auk skráðs fermetrafjölda er undir öllu húsinu rúmgott lagnarými með góðri lofthæð sem er ekki talið með í stærð eignarinnar. Í sölulýsingu kemur fram að það geti skapað ýmsa möguleika fyrir framtíðarnýtingu.
Húsið stendur á gróinni lóð í rótgrónu íbúðahverfi og er lögð áhersla á björt og opin rými. Þar eru stórar stofur með mikilli lofthæð að hluta, fjögur svefnherbergi, tvö baðherbergi, rúmgott eldhús og sérstakt þvottaherbergi. Tvöfaldur bílskúr með rafdrifnum hurðum fylgir eigninni auk rúmgóðra bílastæða.
Garðurinn er sagður einn af kostum eignarinnar. Fyrir framan húsið er stór sólpallur með heitum potti og fallegum gróðri en aftan við húsið er grasflöt og lítill geymsluskúr. Samkvæmt sölulýsingu hefur eigninni verið vel við haldið frá upphafi.
Staðsetningin þykir einnig eftirsóknarverð. Í göngufæri eru meðal annars Húsaskóli, leikskólinn Brekkuborg, íþróttamannvirki og Grafarvogslaug. Þá er stutt í verslunarkjarnann Spöngina með fjölbreyttri þjónustu auk Egilshallar þar sem meðal annars er að finna kvikmyndahús, keilusal, líkamsrækt og skautasvell. Einnig er gott aðgengi að stofnbrautum og almenningssamgöngum.
