Ónefndur karlmaður hefur verið dæmdur í 30 daga skilorðsbundið fangelsi fyrir líkamsárás á strætisvagnstjóra í júní 2024.

Samkvæmt ákæru réðst maðurinn á vagnstjórann í strætisvagni fimmtudaginn 27. júní 2024. Hann sló vagnstjórann í höfuðið og dró hann úr ökumannssætinu áður en hann sló hann ítrekað með krepptum hnefa í höfuðið.

Þá potaði maðurinn tveimur fingrum í augu vagnstjórans, sparkaði í líkama hans og hélt áfram að slá hann. Eftir að vagnstjórinn hafði sleppt taki á manninum sló hann hann aftur í höfuðið. Þegar manninum hafði verið komið út úr strætisvagninum réðst hann enn á vagnstjórann og kleip hann í eyrað.

Vagnstjórinn hlaut eymsli á nefbeini og kinnbeinum auk roða, bólgu og eymsla yfir vinstri hluta brjóstkassa. Var maðurinn ákærður fyrir líkamsárás samkvæmt almennum hegningarlögum.

Maðurinn játaði brotið skýlaust fyrir dómi. Hann sagðist iðrast gjörða sinna og að um einstakt atvik hefði verið að ræða. Hann hefði verið í neyslu þegar árásin átti sér stað en hefði síðan snúið við blaðinu og staðið sig vel.

Við ákvörðun refsingar var meðal annars horft til játningar mannsins og ungs aldurs hans þegar brotið var framið. Þá hafði orðið óútskýrður dráttur á meðferð málsins hjá lögreglu sem honum varð ekki kennt um.

Var hann dæmdur í 30 daga fangelsi en fullnustu refsingarinnar frestað skilorðsbundið í tvö ár. Enginn sakarkostnaður féll til vegna málsins.