Glæsilegt einbýlishús á eftirsóttum útsýnisstað efst á Arnarnesinu í Garðabæ hefur verið sett á sölu fyrir 220 milljónir króna.

Um er að ræða 280 fermetra hús á pöllum við Þrastanes 15 sem stendur á 1.314 fermetra eignarlóð. Húsið var byggt árið 1977 en athygli vekur að nokkuð óvenjuleg áferð er á öllum veggjum.

Fyrir liggja samþykktar teikningar af frekari stækkun hússins, meðal annars með tvöföldum bílskúr, íbúðarrými og sólskála.

Húsið er byggt á pöllum og eru loft að stórum hluta klædd gegnheilli kanadískri eik. Gólfefni eru að mestu úr norskri skífu og innihurðir vandaðar norskar eikar-fulningahurðir. Þá hefur þakjárn á austurhlið hússins verið endurnýjað.

Lóðin er snyrtilega frágengin með tyrfðum flötum, trjágróðri, hellulagðri verönd með skjólveggjum og malarborinni innkeyrslu. Staðsetning eignarinnar er sögð afar góð, á rólegum og grónum útsýnisstað á Arnarnesinu í Garðabæ.