Elliði Vignisson, bæjarstjóri og Sjálfstæðismaður, vorkennir Bjarna Bendiktsson, fyrrverandi forsætisráðherra, ef marka má pistil sem hann skrifar á Facebook.
Þar deilir Elliði frétt Vísis þar sem Snærós Sindradóttir, fyrrverandi fjölmiðlakona, biður forsætisráðherrann að setja tappa í „tengdasoninn“ og vísar þar í tónlistarmanninn Brynjar Barkarson. Brynjar hafði látið þau orð falla að Helga Vala Helgadóttir, móðir Snærósar, hafi stórgrætt á hælisleitendum á Íslandi í störfum sínum sem lögmaður.
„Mikið afskaplega er þetta óviðeigandi. Það er ætíð ömurleg lágkúra að veitast að fólki vegna fjölskyldutengsla. Það er sérstaklega skaðlegt í stjórnmálum. Það er sínu verra þegar gerðar eru árásir á fólk vegna tengsla við fyrrverandi stjórnmálafólk,“ skrifar Elliði.
Þá segir hann að það sé rannsóknarefni hvað vinstra fólk virðist vera með Bjarna á heilanum.
„Í mínum huga fráleitt að flytja ábyrgð einstaklinga yfir á fjölskyldumeðlimi, hvort sem þeir búa í sama húsið eða ekki,“ skrifar bæjarstjórinn svo í athugasemdakerfinu á Facebook.
„Svo væri nú ef til ástæða fyrir þá sem gagnrýna framgöngu þessa manns að halda sig við rökin í stað þess að velta sér upp úr því hver sé tengdapabbi hans, hvaða númer er á íþróttabúning hans, hvort að hann talar enskuskotið, hvort að fólkið sem hlustaði á hann veifaði íslenska fánanum eða allt þetta sem þið eruð að reyna að setja kastljósið á. Það lýsir ekki sterkri málefnalegri stöðu að sneiða hjá kjarna málsins og forðast rökræðu.“
Auðmjúka ofurhetjan
Elliði hefur lengi verið mikill stuðningsmaður Bjarna og birt meðal annars mynd af honum í október 2023 þar sem hann er sýndur sem ofurhetja.
„Enn og aftur sýnir Bjarni Ben hversu öflugur stjórnmálamaður hann er. Hann sá sóknarfæri fyrir flokkinn og nýtti það. Sóknarfærið er fólgið í því að stíga út úr ráðuneytinu þar sem hann hefði ekki fengið neinn frið fyrir hælbítum. Samhliða fær flokkurinn tækifæri til að safna kröftum sínum og kjarna sig.
Þetta gerir hann af virðingu og auðmýkt. Svo ósammála sem hann er umboðsmanni þá virðir hann afstöðu hans,“ skrifaði Elliði þegar Bjarni Benediktsson skipti um embætti við Þórdísi Kolbrúnu Gylfadóttur eftir að Umboðsmaður Alþingis mat að hann hafi verið vanhæfur sem fjármálaráðherra til að sjá um söluna á Íslandsbanka.
