Reinel Santiago Sanguino hefur verið dæmdur í 18 mánaða fangelsi í Héraðsdómi Reykjaness fyrir stórfellt fíkniefnalagabrot. Hann flutti tæplega einn og hálfan lítra af kókaíni í vökvaformi innvortis til landsins í maí síðastliðnum.

Samkvæmt dómi kom Sanguino til Íslands með flugi 24. maí og hafði þá innvortis 1.480 millilítra af fljótandi kókaíni. Styrkleiki efnanna mældist á bilinu 51 til 55 prósent og voru þau ætluð til söludreifingar hér á landi í ágóðaskyni.

Sanguino játaði brotið skýlaust fyrir dómi og var málið því tekið til dóms án frekari sönnunarfærslu. Hann hafði ekki áður gerst sekur um refsiverða háttsemi svo kunnugt væri.

Við ákvörðun refsingar leit dómurinn meðal annars til þess að ekkert í gögnum málsins benti til þess að hann hefði átt fíkniefnin eða komið að skipulagningu kaupanna og innflutningsins með öðrum hætti en að samþykkja að flytja þau til Íslands. Þá var greið játning hans metin honum til málsbóta.

Á móti kom að um var að ræða verulegt magn af sterku kókaíni sem ætlað var til sölu hér á landi.

Sanguino var dæmdur til að greiða tæpar 1,95 milljónir króna í sakarkostnað, þar á meðal rúmlega 1,2 milljónir í þóknun verjanda síns.