Lögreglan á höfuðborgarsvæðinu hafði í nógu að snúast í gærkvöldi og í nótt og sinnti fjölda mála af ólíkum toga, þar á meðal þjófnuðum, ofbeldismálum, umferðarlagabrotum og almennum útköllum vegna óspekta.
Tilkynningar bárust um hnupl í verslun í hverfi 104 þar sem málið var afgreitt á vettvangi. Þá höfðu lögreglumenn einnig afskipti af pari í hverfi 103 sem var staðið að þjófnaði úr verslun. Parið var flutt á lögreglustöð þar sem málið var unnið áfram.
Nokkur útköll tengdust einstaklingum í annarlegu ástandi eða til vandræða. Í hverfi 101 voru nokkrir aðilar handteknir, meðal annars einstaklingur sem neitaði að gefa upp nafn sitt, annar sem var undir áhrifum áfengis og fór ekki að fyrirmælum lögreglu, og sá þriðji sem réðst á lögreglu við afskipti. Í öðru tilviki í sama hverfi var einstaklingur handtekinn fyrir brot á lögreglusamþykkt, vopnalagabrot og að neita að gefa upp nafn.
Í hverfi 108 var einstaklingur handtekinn grunaður um sölu fíkniefna og brot á vopnalögum. Þá var einnig brotist inn í kirkju í sama hverfi, en gerendur voru farnir af vettvangi þegar lögregla kom á staðinn. Ekki liggur fyrir á þessari stundu hvort einhverju hafi verið stolið.
Alvarlegt umferðarlagabrot átti sér stað í hverfi Hafnarfirði þegar ökumaður ók á 212 km/klst þar sem hámarkshraði er 80 km/klst. Viðkomandi reyndi að komast undan lögreglu en var stöðvaður og fluttur á lögreglustöð þar sem hann var sviptur ökuréttindum. Í sama hverfi var lögregla einnig kölluð á pizzastað vegna manns sem var til vandræða og var honum vísað á brott.
Tilkynnt var um líkamsárás á skemmtistað í Kópavogi, en gerandi var farinn af vettvangi við komu lögreglu. Þá varð umferðaróhapp í Kópavogi þar sem ökumaður ók upp á hringtorg. Sá reyndist undir áhrifum áfengis og var handtekinn.
Einnig varð óhapp á Tungubakkaflugvelli þegar flugvél hvolfdi við lendingu. Einn var um borð en slasaðist ekki.
Loks var lögregla kölluð til vegna slagsmála í strætisvagni í Árbænum, þar sem brugðist var við aðstæðum á vettvangi.
