Jóhann Páll Jóhannsson, umhverfis-, orku- og loftslagsráðherra, mun halda opnunarávarp á haustfundi SVEIT (Samtök fyrirtækja á veitingamarkaði) í næstu viku en samtökin hafa verið harðlega gagnrýnd af stéttarfélögum landsins og sæta þau rannsókn Samkeppniseftirlitsins.

Hafa samtökin verið sökuð um að fara á svig við lög með því að hafa stofnað stéttarfélagið Virðingu, sem önnur stéttarfélög hafa kallað gervistéttarfélag, sem berst ekki fyrir réttindum félagsmanna heldur grefur undan þeim.

Segist standa með stéttarfélögum

Mannlíf hafði samband við Jóhann Pál að til spyrja hann út í ástæður þess af hverju hann taki þátt í þessum fundi og hvað hann muni ræða en Jóna Þórey Pétursdóttir, aðstoðarmaður Jóhanns, svaraði fyrirspurnum Mannlífs fyrir hönd Jóhanns.

„Erindi ráðherra fjallar um breytingar á fyrirkomulagi heilbrigðiseftirlits sem eru í farvatninu og sem umhverfisráðherra og atvinnuvegaráðherra kynntu á blaðamannafundi fyrr í þessum mánuði,“ sagði Jóna í skriflegu svari.

„Hvað varðar spurningarnar að öðru leyti þá er afstaða ráðherra skýr og hefur komið ítrekað fram í þingræðum hans á síðustu árum: rík stéttarfélagsaðild og skipulagður vinnumarkaður eru lykillinn að velferð launafólks á Íslandi og límið í norrænu velferðarþjóðfélagi. Atvinnurekendur og samtök þeirra verða að virða leikreglurnar og gul stéttarfélög eru meinsemd sem þarf að uppræta.“

Efling ekki hrifið af þátttöku ráðherra

Sólveig Anna Jónsdóttir, formaður Eflingar, hefur sent ráðherra áskorun um að hætta við þátttöku sína á viðburðinum.

„Ég lýsi furðu minni á því að þú skulir kjósa að taka þátt í viðburði á vegum SVEIT sem augljóslega þjónar þeim tilgangi að hvítþvo samtökin og ljá þeim yfirbragð virðuleika. Það kemur mér á óvart að þú viljir láta nota þig og stöðu þína sem ráðherra í ríkisstjórn Íslands á þennan hátt,“ segir í áskorun Sólveigar Önnu.