Fjöldi þjóðþekktra Íslendinga hefur skrifað undir opið bréf þar sem Alþingi er hvatt til að hafna frumvarpi um svokallaða brottfararstöð, sem heimilar meðal annars að börn verði sett í varðhald.

Meðal þekktra einstaklinga sem hafa skrifað undir eru Bubbi Morthens, Einar Már Guðmundsson, Sjón, Ævar Þór Benediktsson, Halldóra Geirharðsdóttir, Ilmur Kristjánsdóttir, Una Torfa, Gunnar Helgason, Hallgrímur Helgason og Kristinn Hrafnsson, Sunneva Ása Weisshappel, Þóra Karítas Árnadóttir, Eiríkur Örn Norðdahl, Unnsteinn Manuel Stefánsson, Kristín Eiríksdóttir ,Ásdís María Viðarsdóttir, Lóa Hjálmtýs, Fríða Ísberg, Pálmi Gestsson, Auður Jónsdóttir, Svandís Svavarsdóttir, Friðgeir Einarsson, Jónmundur Grétarsson, Davíð Þór Katrínarson, Haukur Már Helgason, Bergsveinn Birgisson, Þórdís Gísladóttir, Guðmundur Andri Thorsson, Sigursteinn Másson, Bergþóra Snæbjörnsdóttir, auk fjöldi annarra Íslendinga

Í bréfinu er bent á að frelsissvipting barna brjóti gegn Barnasáttmála Sameinuðu þjóðanna, sem hefur lagagildi á Íslandi.

„Barnasáttmáli Sameinuðu þjóðanna er ekki listi af uppástungum. Hann er bundinn í lög og hefur verið það síðan 2013. Ef þú brýtur Barnasáttmálann ertu að brjóta lög,“ er haft eftir Ævari Þór Benediktssyni, sem er meðal undirritaðra.

Mótmælendur segja að varðhald barna geti valdið alvarlegum skaða, jafnvel þótt það sé skammvinnt, og vísa til reynslu frá Noregi þar sem dómstólar hafa komist að þeirri niðurstöðu að slíkar aðstæður brjóti gegn grundvallarréttindum barna.

Þá hafa íslensk mannréttindasamtök einnig varað við frumvarpinu og bent á að það stangist á við alþjóðlegar skuldbindingar Íslands.

„Börn eiga heima í skólum og á leikvöllum – ekki í varðhaldi,“ segir jafnframt í bréfinu.

Undirskriftasöfnunin er nýhafin og opin almenningi. Þegar þetta er skrifað hafa tæplega 400 manns þegar skrifað undir.