Nýverið sendu forstöðumenn tveggja fangelsa, öryggisstjóri Fangelsismálastofnunar, Fangavarðafélag Íslands og Afstaða frá sér yfirlýsingu þar sem vondu og viðvarandi ástandi fangelsismála er lýst.

Er talað um að erfitt sé að tryggja öryggi innan fangelsanna en einnig þá staðreynd að uppbygging hafur setið á hakanum í áratugi.

Þá var bent á það og gagnrýnt að stofnfjárframlag til byggingar nýs fangelsis hafi verið lækkað.

Forstöðumaður Litla-Hrauns, K. Eva Sveinsdóttir, lýsti síðan afar slæmum aðstæðum í fangelsinu í kvöldfréttum RÚV í gærkvöld.

Dómsmálaráðherra segir að þó stofnfjárframlag til byggingar Stóra-Hrauns hafi verið lækkað tímabundið sé það þó þannig að fjármagn sé tryggt til að hefja framkvæmdir við jarðvegsvinnu.

„Þess vegna er ég að setja auka fjármagn í fangelsismálin núna, 230 milljónir, til að auka öryggi inni í fangelsunum og geta tekið betur utan um fangavarðanám en verið hefur,“ sagði Þorbjörg.

Forstöðumaður Litla-Hrauns sagði að það myndi ekki leysa vandamálið að fá eitt nýtt fangelsi; hann erá því að vandinn sé mun stærri og margþættari en það og að nýja heildarstefnu þurfi í málaflokknum.

Þorbjörg segir að verið sé að taka örugg og úthugsuð skref í átt að nýrri heildarstefnu; fjölgun lögreglumanna og stofnun brottfarastöðvar fyrir útlendinga sem neita samvinnu við brottvísun, spili inn í þær áætlanir. Hún sagði einnig að það verði reynt að koma erlendum föngum í afplánun í heimalandinum í mun meira mæli.

Þá er hafin vinna við að koma á stofn sérstakri öryggisvistun sem og að fjölga rýmum á öryggisgeðdeild. Stórar aðgerðir sem taka tíma

„Þetta eru markvissar aðgerðir, þetta eru stórar aðgerðir en þær taka tíma. En ég myndi segja að ástæðan sé sú að fangelsismál á Íslandi hafa því miður ekki fengið þá athygli sem þau eiga skilið og við okkur blasir núna áralangt vandamál og afleiðingar af því. Ég get ekki gert annað en að bregðast við og er nú þegar að gera það bæði með aðgerðum til skemmri tíma og til lengri tíma,“ sagði Þorbjörg S Gunnlaugsdóttir að lokum.