Alexandra Helga Ívarsdóttir, fyrrverandi Ungfrú Ísland og eiginkona Gylfa Sigurðssonar, mun loka barnafataverslun sinni Míu á næstu vikum. Þetta kemur fram í tölvupósti sem hún sendi viðskiptavinum verslunarinnar og í færslu á samfélagsmiðlum, þar sem hún segir ákvörðunina hafa verið tekna eftir langa yfirlegu og umhugsun.
Í póstinum segir Alexandra að komið sé að leiðarlokum í einu skemmtilegasta ferðalagi sem hún hafi farið í, en verslunin hafi verið henni afar kær frá upphafi.
Alexandra Helga stofnaði Míu ásamt Móeiði Lárusdóttur en hún fór úr rekstrinum síðar.
Færsla Alexöndru
Kæru viðskiptavinir og velunnarar Míu💗
Eftir þónokkra yfirlegu og umhugsun hef ég ákveðið að það sé komið að leiðarlokum í einu skemmtilegasta ferðalagi sem ég hef farið í. Verslunin mín Mía mun því loka á næstu vikum.
Mía hefur verið “þriðja barnið mitt” allt frá því hún opnaði sem netverslun árið 2022 og síðar sem glæsileg verslun í Ármúla 40. Þó að verslunarrekstur sé gefandi og skemmtilegur þá er hann á sama tíma krefjandi og nú hef ég ákveðið að snúa mér að öðrum verkefnum ásamt því að gefa hinum tveimur börnunum mínum meiri tíma og athygli.
Á þessu ferðalagi hef ég verið svo lánsöm að kynnast yndislegum hópi viðskiptavina, frábæru starfsfólki, fallegum og flottum birgjum og fleiri aðilum sem með einum eða öðrum hætti lögðu lóð sín á vogarskálarnar í rekstri Míu. Öllu þessu fólki færi ég mínar allra bestu þakkir fyrir samfylgdina og samstarfið.
Eins og tíðkast þegar verslanir loka þá ætlum við að bjóða vörurnar okkar til sölu á útsöluverðum þar til lagerinn klárast. Við viljum því bjóða ykkur velkomin á rýmingarsölu Míu sem mun standa yfir meðan birgðir endast.
Með vinsemd og þökkum,
Alexandra Helga, eigandi Míu ♡
