Lögreglan á höfuðborgarsvæðinu hafði fremur rólega nótt að sögn vakthafandi þegar fréttin er skrifuð. Samtals voru 53 mál skráð hjá embættinu og einn einstaklingur vistaður í fangageymslum lögreglu.

Lögreglumenn höfðu einnig afskipti af sjö ökumönnum vegna ólögmætrar notkunar nagladekkja, en notkun þeirra er nú óheimil.

Nokkur mál tengd umferðarlagabrotum komu upp í nótt. Einn ökumaður var stöðvaður grunaður um akstur undir áhrifum áfengis auk þess sem hann reyndist vera án ökuréttinda. Þá var annar ökumaður stöðvaður vegna gruns um akstur undir áhrifum fíkniefna. Við nánari athugun kom í ljós að hann hafði verið sviptur ökuréttindum og var jafnframt með fíkniefni í fórum sínum. Einnig hafði lögregla afskipti af þriðja ökumanninum sem grunaður var um ölvunarakstur.

Lögreglan var kölluð út vegna tilkynningar um meint yfirstandandi innbrot í íbúðarhúsnæði. Við komu á vettvang fannst enginn sem passaði við lýsingu hins grunaða þrátt fyrir umfangsmikla leit. Síðar kom í ljós að um gest á heimilinu var að ræða en nágranni sem tilkynnti málið hafði ekki kannast við viðkomandi og talið að um innbrotsþjóf væri að ræða.

Þá var einnig tilkynnt um innbrot í veitingahús. Ekki liggur enn fyrir hverju var stolið, en rannsókn málsins stendur yfir.