Útgerðarfélag Reykjavíkur hagnaðist um 19,9 milljónir evra, jafnvirði rúmlega 2,9 milljarða króna, á árinu 2025 samkvæmt nýbirtum ársreikningi félagsins en Heimildin greindi frá málinu.
Hagnaður félagsins jókst verulega frá fyrra ári og má rekja aukninguna að stórum hluta til bættrar afkomu Brims, þar sem Útgerðarfélag Reykjavíkur fer með tæplega 44 prósenta eignarhlut.
Samkvæmt ársreikningnum jókst hlutdeild félagsins í afkomu Brims úr 17,8 milljónum evra árið 2024 í 26,4 milljónir evra árið 2025. Aukinn hagnaður Brims er sagður stafa af hærra afurðaverði á helstu botnfisktegundum auk makríls.
Stjórn félagsins leggur til að greiddur verði 9,9 milljóna evra arður til hluthafa, sem samsvarar tæplega 1,5 milljörðum króna. Guðmundur Kristjánsson, forstjóri Brims, er endanlegur eigandi alls hlutafjár í félaginu í gegnum tengd félög.
