Útgerðarfélagið Brim hefur hafið uppsagnir í uppsjávarvinnslu sinni á Vopnafirði og stendur til að segja upp fastráðningarsamningum um 20 starfsmanna. Fundur með starfsfólki hófst síðdegis í dag þar sem fulltrúar fyrirtækisins kynntu fyrirhugaðar breytingar.

Samkvæmt upplýsingum frá stéttarfélaginu Afli verður þeim sem missa fastráðningu boðið að gera tímabundna samninga sem gilda fram í nóvember. Um er að ræða nærri helming þeirra starfsmanna í vinnslunni sem nú eru með fastráðningarsamninga.

Forsvarsmenn fyrirtækisins hafa ekki tjáð sig efnislega um breytingarnar að svo stöddu.

Brim hagnaðist um 60 milljónir evra, eða um 8,7 milljarða króna, á árinu 2025, samanborið við 40,5 milljóna evra hagnað árið áður.