Verkfræðingafélag Íslands segir áhyggjuefni að óvenju mörg mál vegna uppsagna starfsfólks í fæðingarorlofi hafi komið inn á borð félagsins á síðustu misserum. Í grein sem birt hefur verið á Vísi af hálfu félagsins benda forsvarsmenn þess á að þótt aðstæður séu mismunandi milli mála veki þróunin alvarlegar spurningar um virðingu fyrir réttindum foreldra á vinnumarkaði.

Félagið minnir á að samkvæmt lögum um fæðingar- og foreldraorlof sé vinnuveitendum óheimilt að segja starfsmanni upp vegna þess að hann hafi tekið eða hyggist taka fæðingarorlof. Þá eigi starfsmaður almennt rétt á að snúa aftur í fyrra starf að loknu orlofi. Uppsögn á meðan á fæðingarorlofi stendur sé aðeins heimil ef gildar ástæður liggja að baki og beri vinnuveitanda að sýna fram á að ákvörðunin tengist ekki töku orlofsins.

Í greininni kemur fram að lagavernd hefjist þegar starfsmaður tilkynnir yfirmanni um væntanlegan barnsburð og vari þar til viðkomandi snýr aftur til starfa. Félagið telur að sumir vinnuveitendur skorti þekkingu á þessum reglum en í öðrum tilvikum kunni þeir að gera ráð fyrir að starfsfólk leiti ekki réttar síns á viðkvæmum tíma.

Félagið hvetur launþega sem fá uppsögn á meðgöngu eða í fæðingarorlofi til að leita tafarlaust til stéttarfélags síns. Mikilvægt sé að bregðast hratt við þar sem réttindi geti glatast ef málum er ekki fylgt eftir innan tilskilinna tímamarka.