Helga Vala Helgadóttir, lögmaður og fyrrverandi þingmaður Samfylkingarinnar, gagnrýnir harðlega langar umræður á Alþingi um kílómetragjaldið í færslu sem hún birti á Facebook í morgun. Hún segir stjórnarandstöðuna hafa valið sér hól til að deyja á rétt fyrir jólahlé og varar þingmenn við því að almenningur fylgist lítið sem ekkert með umræðunum.

Helga Vala tekur fram að hún vilji ekki gera lítið úr störfum þingmanna, en eftir samtal við fyrrverandi kollega hafi hún „ekki getað staðist mátið.“ Hún vísar til þess að þingið hafi eytt „9 klukkustundum“ í umræður um kílómetragjaldið í gær og að það hafi verið „17 á mælendaskrá þegar þingfundi lauk.“ Bætti hún við: „Augljóst er að þetta er hóllinn sem stjórnarandstaðan virðist ætla að deyja á fyrir næsta þinghlé um jólin.“

„Til ykkar sem eruð á mælendaskrá vil ég segja: ég er voða hrædd um að almenningur sé hættur að hlusta,“ skrifar hún og bendir á að tímabilið fyrir jól sé óheppilegur vettvangur fyrir löng þingátök. „Núna eru það tónleikar, smákökugerð, kyrrðarstund með fjölskyldu og jólahlaðborð sem eiga hug almennings en ekki stælar í þinghúsinu.“

Hún rifjar upp að þegar hún sjálf starfaði á Alþingi hafi henni oft fundist að almenningur fylgdist grannt með, en svo reyndist sjaldnast vera: „Svo mættum við í smákökur eða á jólaskemmtun og ég spurð hvort ég væri ekki komin í jólafrí ... Það var á þeirri stundu sem maður áttaði sig á því að þingið er stundum eins og í vacumpakkningu. Það vantar súrefni.“

Helga Vala gagnrýnir einnig að sumir þingmenn taki þátt í málþófi um kílómetragjaldið þrátt fyrir að hafa stutt það í síðustu ríkisstjórn. Að lokum tekur hún undir orð eiginmanns síns, Gríms Atlasonar, og spyr hvers vegna ekki sé rætt jafn af krafti um brýnni málefni.

„Þegar þingmenn hrúgast í málþóf um kílómetragjaldið, sem hluti þeirra studdi í síðustu ríkisstjórn, þá get ég ekki annað en tekið undir með Grími sem spyr hvar er málþófið um börnin sem fá ekki nauðsynlega heilbrigðis/velferðarþjónustu á Íslandi?“