Lögregla sinnti fjölbreyttum verkefnum í gærkvöldi og í nótt, þar á meðal útköllum vegna slagsmála, umferðarslysa og fíkniefnamála.
Tilkynnt var um þrjá til fjóra einstaklinga sem áttu að hafa verið að slást fyrir utan ölhús. Þegar lögregla kom á vettvang var enginn þar að finna. Þá var einn einstaklingur síðar handtekinn og vistaður í fangaklefa, grunaður um þjófnað, húsbrot og vörslu fíkniefna.
Lögregla sinnti einnig nokkrum verkefnum tengdum umferðinni. Bifreiðar voru stöðvaðar í almennu umferðareftirliti, meðal annars þar sem ökumaður var grunaður um að hafa ekið gegn rauðu ljósi og annar um akstur undir áhrifum fíkniefna. Sá var látinn laus að lokinni blóðsýnatöku. Þá var ökumaður kærður fyrir að aka án gildra ökuréttinda og annar fékk sekt fyrir að aka bifreið án framhöggvara og skráningarmerkis.
Tilkynnt var um nokkur umferðaróhöpp. Í einu tilviki varð slys á fólki á stofnbraut og var mikill viðbúnaður á vettvangi. Málið er til rannsóknar og ekki hafa fengist frekari upplýsingar að svo stöddu. Einnig var tilkynnt um mannlausa og mikið skemmda bifreið utan vegar, en ekki er vitað hver ók bifreiðinni og er það mál einnig til rannsóknar.
Lögreglu barst beiðni um aðstoð þegar knapi féll af hestbaki og var viðkomandi fluttur á sjúkrahús til skoðunar. Þá var tvívegis óskað eftir aðstoð lögreglu vegna þjófnaðar úr matvöruverslun og tilkynnt var um eld í ruslatunnu, þar sem slökkvilið var einnig kallað til.
Lögregla sinnti jafnframt aðstoð við ölvaða einstaklinga. Tveir einstaklingar voru aðstoðaðir heim vegna ölvunar og einum var vísað af ölhúsi vegna ástands síns. Síðar um nóttina þurfti aftur að hafa afskipti af sama einstaklingi vegna ónæðis. Þá var einnig tilkynnt um einstakling sem reyndi viljandi að hindra umferð.
