Hildur Björnsdóttir, borgarstjóri Reykjavíkur, hefur ráðið Söndru Hlíf Ocares, lögfræðing og fyrrverandi varaborgarfulltrúa Sjálfstæðisflokksins, tímabundið sem verkefnastjóra á skrifstofu borgarstjóra.

Sandra hóf störf 1. júlí síðastliðinn. Í svari borgarritara við fyrirspurn Heimildarinnar kemur fram að starf hennar felist meðal annars í undirbúningi, samhæfingu og eftirfylgd stefnumótandi verkefna á vegum skrifstofunnar. Starfið var ekki auglýst þar sem um tímabundna ráðningu er að ræða og kemur jafnframt fram að ekki sé verið að fjölga stöðugildum á skrifstofunni.

Sandra er lögfræðingur að mennt og hefur áður gegnt ýmsum trúnaðarstörfum fyrir Sjálfstæðisflokkinn. Hún var varaborgarfulltrúi flokksins og varð fyrsti varaborgarfulltrúi eftir að Helgi Áss Grétarsson sagði sig úr flokknum fyrr á árinu. Þá hefur hún meðal annars verið varafulltrúi í stjórn Félagsbústaða, verkefnastjóri hjá Íslenska byggingavettvangnum og setið í stjórn kærunefndar útlendingamála.

Ráðningin kemur í kjölfar umfangsmikilla breytinga á stjórnsýslu Reykjavíkurborgar í sumar. Undir lok júní voru skrifstofa samskipta og viðburða og mannréttindaskrifstofa lagðar niður og alls 18 störf felld niður.

Sandra vakti athygli á síðasta kjörtímabili þegar hún studdi uppfærslu samgöngusáttmála höfuðborgarsvæðisins þvert á afstöðu annarra borgarfulltrúa Sjálfstæðisflokksins þegar hún kom inn sem varaborgarfulltrúi fyrir Hildi. Þótt málið vandræðalegt innan flokksins og ýtti undir sögur þess efnis að flokkurinn væri klofinn í borginni.