Lögreglan hafði í nógu að snúast í umferðareftirliti síðasta sólarhringinn þar sem nokkrir ökumenn voru stöðvaðir vegna aksturs undir áhrifum áfengis eða fíkniefna, auk annarra umferðarlagabrota.
Tveir ökumenn voru handteknir eftir að hafa reynst ölvaðir við akstur við almennt eftirlit lögreglu. Annar þeirra reyndist jafnframt sviptur ökuréttindum og hafði ekki notað sætisbelti við aksturinn. Þá var annar ökumaður stöðvaður grunaður um akstur undir áhrifum fíkniefna og færður á lögreglustöð í hefðbundið ferli.
Einnig var ökumaður handtekinn eftir að hafa verið stöðvaður ölvaður og sviptur ökuréttindum. Sá hafði áður sama dag verið stöðvaður af lögreglu fyrir sama brot á sömu bifreið.
Þá voru fleiri ökumenn stöðvaðir vegna brota á umferðarlögum, meðal annars fyrir akstur án gildra ökuréttinda, notkun farsíma án handfrjálsbúnaðar og vegna negldra hjólbarða sem enn voru undir bifreiðum. Málin voru afgreidd með vettvangsskýrslum.
Lögreglu barst einnig tilkynning um grunsamlegar mannaferðir á byggingasvæði. Ekkert óeðlilegt reyndist þó vera á staðnum þegar lögregla kom á vettvang.
