Inga Sæland, mennta- og barnamálaráðherra, greinir frá andláti föður síns, Ástvaldur Einar Steinsson, í tilfinningaþrungnu myndbandi sem hún birti á samfélagsmiðlum.

„Pabbi minn, hann ákvað að yfirgefa þessa jarðvist á miðvikudaginn var,“ segir Inga í myndbandinu. Hún segir föður sinn hafa verið sáttan við að kveðja lífið.

„Hann var ekkert að velta fyrir sér hvort það væri einhver kosningabarátta eða eitthvað. Hann var sæll að fá að fara,“ segir hún jafnframt.

Inga segir að hún hafi verið hjá föður sínum síðustu daga og hyggist ekki snúa aftur til Reykjavíkur strax.

„Ég er búin að vera hérna hjá honum og er að hugsa um að koma ekki aftur til Reykjavíkur fyrr en þessum áfanga hefur verið lokið,“ segir hún.

Faðir Ingu, Ástvaldur Einar Steinsson var 95 ára gamall, fæddur 21. ágúst 1930. Hann starfaði sem sjómaður og netagerðarmaður.

Í lok myndbandsins vitnar Inga í ljóð og segir að faðir sinn hafi viljað vera þar sem hann var síðustu stundirnar.

„Hér vildi hann vera og hvergi annars staðar,“ segir hún áður en hún fer með ljóðlínur um kyrrð, náttúrufegurð og innri frið.

„Í kyrrð og fegurð fjalla á ég heima
Þar finnst mér sál mín öðlast djúpan frið
Og hvergi er betra amstri öllu að gleyma
né efla tengsl við æðrimáttasvið.“

Að endingu kveður hún föður sinn með hlýjum orðum:

„Elsku pabbi, guð varðveiti þig og blessi, takk fyrir allt og allt. Ég veit það eru margir í sumarlandinu sem hafa tekið þér opnum örmum.“