Marco Rubio, utanríkisráðherra Bandaríkjanna, stóð í gær fyrir alþjóðlegri ráðstefnu um það sem bandaríska utanríkisráðuneytið kallar „öfgahryðjuverk á vinstri vængnum“. Fulltrúar frá 66 ríkjum, þar á meðal Íslandi, sátu fundinn, að því er fram kemur í frétt Time.
Markmið ráðstefnunnar var að afla alþjóðlegs stuðnings við að bregðast við því sem ráðuneytið lýsir sem endurvakinni ógn af slíkum öfgum.
Í setningarræðu sinni sagði Rubio að um væri að ræða eitthvað sem væri „sérstaklega og einstaklega illt“ sem byggðist fyrst og fremst á hatri á sjálfri siðmenningunni.
„Þetta er alþjóðleg ráðstefna vegna þess að við stöndum frammi fyrir alþjóðlegri ógn sem nær yfir landamæri. Við eigum engan annan kost en að takast á við þessa ógn saman. Annaðhvort vinnum við saman yfir landamæri eða hryðjuverkamenn munu halda áfram að nýta sér glufurnar á milli þeirra,“ sagði Rubio.
Samkvæmt upplýsingum frá bandaríska utanríkisráðuneytinu sendu alls 66 ríki fulltrúa á ráðstefnuna. Þar á meðal voru Ísland, Danmörk, Noregur, Finnland, Bretland, Frakkland, Þýskaland, Kanada, Ástralía, Ísrael, Japan, Suður-Kórea og fjöldi annarra ríkja.
Ekki hefur verið upplýst hver sat fundinn fyrir hönd Íslands.
Breytt áhersla Trump-stjórnarinnar
Ráðstefnan kemur á sama tíma og Donald Trump forseti og ríkisstjórn hans hafa ítrekað kennt hópum á vinstri væng stjórnmálanna um aukið pólitískt ofbeldi í Bandaríkjunum og gert þá að meginviðfangsefni í baráttunni gegn hryðjuverkum. Með því hefur verið horfið frá áherslum Joe Biden, forvera Trumps.
Rubio hélt því fram að öfgar á vinstri vængnum hefðu lengi verið „blindi bletturinn“ í umræðu um pólitískt ofbeldi og sakaði bandarísk stjórnvöld um að hafa afsakað ofbeldi sem tengdist vinstrisinnuðum málstað.
Hann nefndi sérstaklega mótmæli Black Lives Matter-hreyfingarinnar árið 2020 í kjölfar dauða George Floyd.
Stephen Miller, staðgengill starfsmannastjóra Hvíta hússins, tók í svipaðan streng og sagði öfgaöfl á vinstri vængnum stefna að því að grafa undan bandarísku stjórnkerfi.
Scott Bessent fjármálaráðherra sagði jafnframt að vinstrisinnuð öfgahreyfing beitti ekki aðeins ofbeldi heldur einnig „hljóðlátari“ aðferðum, svo sem tilraunum til að þagga niður í andstæðingum og veikja opinberar stofnanir.
Í yfirlýsingu Hvíta hússins sagði að ráðstefnan markaði upphaf að „fordæmalausri alþjóðlegri sókn gegn alþjóðlegri ógn róttækra vinstri öfgamanna“ og að Trump-stjórnin myndi framvegis taka á slíkum öfgum af sömu festu og áður hefði verið gert gagnvart hryðjuverkum jihadista.
Gögn sýna fleiri banvæn árásir frá hægri öfgamönnum
Þrátt fyrir málflutning Trump-stjórnarinnar bendir Time á að rannsóknargögn sýni að hægri öfgamenn hafi valdið fleiri banvænum árásum í Bandaríkjunum en öfgamenn á vinstri vængnum, þótt árásum vinstrisinnaðra hópa hafi fjölgað á undanförnum árum.
Samkvæmt rannsókn Cato-stofnunarinnar frá september 2025 voru 81 drepnir í pólitísku ofbeldi í Bandaríkjunum á síðustu fimm árum. Þar af voru 54 prósent dauðsfalla rakin til hægri öfgamanna, 22 prósent til vinstri öfgamanna og 21 prósent til íslamista.
Önnur rannsókn, sem birt var árið 2024 á vegum National Institute of Justice, komst að þeirri niðurstöðu að hægri öfgamenn hefðu frá árinu 1990 framið mun fleiri hugmyndafræðilega drifin manndráp en bæði vinstri öfgamenn og íslamskir öfgamenn.
Jafnframt bendir nýleg rannsókn Center for Strategic and International Studies (CSIS) til þess að frá 2016 til 2025 hafi hægri öfgamenn valdið 82 dauðsföllum, en vinstri öfgamenn 13. Sú rannsókn sýnir þó einnig að atvik tengd vinstri öfgum hafi farið fjölgandi og að árið 2025 hafi þau í fyrsta sinn verið fleiri en atvik tengd hægri öfgum.
