Landhelgisgæsla Íslands fylgist nú grannt með ferðum rússnesks herskips sem statt er innan íslenskrar efnahagslögsögu en utan 12 sjómílna landhelgi landsins en greint er frá þessu í tilkynningu frá stjórnvöldum.

Skipið siglir á hafsvæðinu milli Íslands og Grænlands og er eftirlitið unnið í nánu samráði við varnarmálaskrifstofu utanríkisráðuneytisins og herstjórnir Atlantshafsbandalagsins.

Um er að ræða rússneska njósnaskipið Yuri Ivanov, sem fylgdist með æfingu Atlantshafsbandalagsins á Norður-Atlantshafi í síðustu viku. Samkvæmt upplýsingum stjórnvalda er skipið búið takmörkuðum vopnabúnaði og sinnir fyrst og fremst njósna- og upplýsingaöflunarverkefnum.

Engar vísbendingar eru þó um að skipið ógni neðansjávarinnviðum eða öryggi sjófarenda á svæðinu að svo stöddu.

Rússnesk herskip af þessu tagi eru sögð fylgjast reglulega með æfingum og aðgerðum Atlantshafsbandalagsins og sigla gjarnan inn í efnahagslögsögur annarra aðildarríkja bandalagsins. Nýverið var meðal annars greint frá veru Yuri Ivanov undan ströndum Noregs.

Þyrlusveit Landhelgisgæslunnar fór í eftirlitsflug að skipinu í gær og tók ljósmyndir af því. Í morgun var skipið á siglingu vestur af landinu.

Jafnframt kemur fram að fylgst sé náið með ferðum skipsins í stjórnstöð Atlantshafsbandalagsins á öryggissvæðinu á Keflavíkurflugvelli.