Forsætisráðherra segir að Útlendingastofnun hafi verið í lófa lagið að vísa unglingspilti frá Kólumbíu úr landi; það hafi hins vegar verið ákvörðun stofnunarinnar að gera það ekki.
Þingmenn Sjálfstæðisflokks og Miðflokks saumuðu ansi hressilega að forsætisráðherra vegna ákvörðunar formanns allsherjar- og menntamálanefndar þess efnis að upplýsa Útlendingastofnun að hinn sautján ára Oscar Florez frá Kólumbíu fengi nánast örugglega íslenskan ríkisborgararétt. Varð það til þess að Útlendingastofnun frestaði því brottflutningi drengsins á þriðjudaginn.
Guðrún Hafsteinsdóttir þingmaður og fyrrverandi dómsmálaráðherra sakaði formanninn, Víði Reynisson, um að hafa lekið trúnaðarupplýsingum út úr nefndinni með því að upplýsa Útlendingastofnun um málið; því hafi hann haft pólitísk sem og ólögmæt afskipti til að framkalla niðurstöðu sem honum væri þóknanleg:
„Þegar einstakir þingmenn í meiri hluta ríkisstjórnarinnar telja sér heimilt að grípa fram fyrir hendur kerfisins í krafti stöðu sinnar þá er það ekki aðeins óboðlegt heldur grefur það undan trausti á kerfinu, jafnræði umsækjenda og lögmæti ákvarðana,“ sagði Guðrún við fréttastofu RÚV.
Forstjóri Útlendingastofnunar vildi staðfestingu frá Víði að drengurinn fengi ríkisborgararétt.
Þingmaður Miðflokksins, Ingibjörg Davíðsdóttir, heimtaði líka skýringa frá forsætisráðherra:
„Það getur ekki talist eðlilegt að einstaklingar sem uppfylla ekki skilyrði til hælis og fá synjun um vernd frá tveimur stjórnsýslustigum geti leitað ásjár Alþingis og fengið vernd þannig, nánast með loforði um veitingu ríkisborgararéttar. Hér hefur verið opnað pandórubox með inngripi formanns allsherjarnefndar og jafnvel er talið að viðkomandi hafi brotið stjórnsýslulög með inngripi sínu.“
Forsætisráðherra, Kristrún Frostadóttir, sagði að stór og mikil orð um gagnaleka hafi verið látin falla í þinginu og minnti um leið fólk á að stjórnsýslulög gildi ekki um störf löggjafarvaldsins; Kristrún þverneitaði með öllu að Víðir hafi gefið Útlendingastofnun nokkur fyrirmæli í málinu: Hann hafi einungis verið að upplýsa hana um stöðu málsins:
„Það er Útlendingastofnun sjálf sem ákvað að aðhafast eitthvað í þessu máli og vitnar í því samhengi í heimild sem þau hafa. Þau þurftu ekkert að bregðast við þessum upplýsingum.“
Kristrún benti enn fremur á að fyrirkomulag þetta hafi verið viðhaft á þinginu um langt árabil og ef þingmönnum þætti tilefni til að breyta því, þá væri það alfarið ákvörðun þingsins:
„En það er hægt að fletta því upp, áraraðir aftur í tímann, þar sem fólk er að taka mynd af sér með fólki, sem hefur áður fengið synjun á öðrum stigum, eftir að hafa veitt þeim ríkisborgararétt hér inni.“
