Einstaklingur kveikti í sér í gamla kirkjugarðinum í Keflavík í morgun og var fluttur á sjúkrahús með brunasár á líkama en þetta kemur fram í tilkynningu frá lögreglunni.

Lögreglunni á Suðurnesjum barst tilkynning klukkan 09:10 um einstakling í ójafnvægi í Reykjanesbæ. Þegar lögreglu bar að garði var viðkomandi sagður æstur, ógnandi og ekki fara að fyrirmælum lögreglu.

Samkvæmt upplýsingum frá lögreglu hafði einstaklingurinn hellt bensíni yfir sig og hótað að kveikja í sér. Lögregla beitti rafbyssu í tilraun til að yfirbuga hann, en það bar ekki tilætlaðan árangur. Í kjölfarið tókst viðkomandi að bera eld að sér með kveikjara sem hann var með á sér.

Einstaklingurinn var fluttur á sjúkrahús til aðhlynningar. Lögreglan á Suðurnesjum segir að ekki verði veittar frekari upplýsingar um málið að svo stöddu.