Lögreglan á höfuðborgarsvæðinu leitar nú vitna í tengslum við rannsókn á innbroti í Reykjabúið á Suður-Reykjum í Mosfellsbæ aðfaranótt mánudagsins 1. júní. Brotið var inn í hænsnabú á svæðinu um klukkan fjögur um nóttina, samkvæmt tilkynningu frá lögreglu.

Að sögn lögreglu var innbrotsþjófurinn svartklæddur og sást koma gangandi að Reykjabúinu frá Bjargsvegi. Talið er mögulegt að viðkomandi hafi lagt ökutæki sínu fjarri vettvangi og gengið síðasta spölinn að hænsnabúinu. Lögregla telur líklegt að hann hafi komið frá svæðum á borð við Skammdal, Helgafellshverfi, Reykjahverfi eða af Hafravatnsvegi.

Í tilkynningu lögreglu kemur fram að mörg ökutæki séu búin myndavélabúnaði og því sé hugsanlegt að myndefni frá umræddum tíma sé til staðar hjá vegfarendum. Þá eru forsvarsmenn öryggismyndavéla á svæðinu einnig hvattir til að kanna hvort upptökur geti nýst rannsókninni.

Þeir sem kunna að búa yfir upplýsingum eða myndefni eru beðnir um að hafa samband við lögreglu.