Lögreglan á höfuðborgarsvæðinu hafði í ýmsu að snúast síðasta sólarhringinn. Meðal verkefna voru þjófnaðir, umferðarlagabrot, ölvun og átök.
Tilkynnt var um vasaþjófnað í miðbæ Reykjavíkur og er málið til rannsóknar. Þá var tilkynnt um þjófnað í matvöruverslun sem var afgreiddur með skýrslutöku á vettvangi. Einnig var tilkynnt um annan þjófnað og innbrot í verslun, en innbrotið er til rannsóknar.
Lögreglu barst tilkynning um alblóðugan mann á gangi í miðborginni. Í ljós kom að maðurinn hafði lent í óhappi og var honum veitt aðstoð. Þá var tilkynnt um ölvaðan einstakling til ama. Síðar barst önnur tilkynning vegna sama manns og var hann að lokum handtekinn og fluttur á lögreglustöð.
Nokkuð var um umferðarlagabrot. Ökumaður var stöðvaður eftir að í ljós kom að barn í bifreið hans var án öryggisbeltis. Ökumaðurinn var jafnframt ekki með ökuskírteini meðferðis og var sektaður. Annar ökumaður var sektaður fyrir að aka gegn rauðu ljósi.
Tveir ökumenn voru handteknir, hvor í sínu lagi, grunaðir um akstur undir áhrifum fíkniefna. Þá var ökumaður sektaður fyrir að nota farsíma við akstur án handfrjáls búnaðar og annar fyrir að aka án öryggisbeltis.
Tveir ökumenn voru stöðvaðir vegna hraðaksturs. Annar ók á 116 kílómetra hraða þar sem hámarkshraði er 80 km/klst. Sá reyndist einnig vera án ökuréttinda. Hinn var stöðvaður á 141 km/klst. þar sem hámarkshraði er 80 km/klst. Báðir voru sektaðir.
Lögreglu bárust einnig tilkynningar um tvö umferðaróhöpp. Þá kom lögregla að átökum í verslun og var einn handtekinn vegna brots á lögreglusamþykkt Reykjavíkur. Að lokum var tilkynnt um nokkra einstaklinga til ama fyrir framan veitingastað.
