Alls voru 62 mál skráð í kerfum lögreglu frá klukkan 17:00 til 05:00 samkvæmt dagbók lögreglu.
Meðal verkefna lögreglu var að ökumaður var kærður þar sem bifreið hans var á nagladekkjum utan leyfilegs tíma. Þá voru tveir ökumenn stöðvaðir fyrir of hraðan akstur.
Tilkynnt var um innbrot og voru meintir gerendur handteknir og vistaðir í fangaklefa lögreglu. Þá var ökumaður stöðvaður við akstur en reyndist sviptur ökuréttindum. Bifreið hans var jafnframt á nagladekkjum og með röng skráningarmerki. Skýrsla var rituð vegna málsins.
Lögreglu barst einnig tilkynning um eignaspjöll og er málið til rannsóknar. Þá var ökumaður stöðvaður grunaður um akstur undir áhrifum ávana- og fíkniefna.
Í öðru tilviki var ökumaður stöðvaður fyrir að nota farsíma við akstur án handfrjáls búnaðar. Þá varð umferðaróhapp á tímabilinu, en engin slys urðu á fólki.
Einnig var ökumaður stöðvaður grunaður um akstur undir áhrifum áfengis og voru skráningarmerki fjarlægð af bifreið vegna skorts á lögboðnum tryggingum.
