Lögreglan á höfuðborgarsvæðinu hefur til skoðunar atvik sem kom upp í Holtinu í Hafnarfirði í nótt þar sem þrír drengir lentu í átökum. Á myndbandi af atvikinu virðist einn þeirra draga upp skammbyssu og beina henni að öðrum dreng.

Myndbandið hefur verið í dreifingu á samfélagsmiðlum og vakið óhug meðal íbúa hverfisins.

„Við erum að skoða þetta,“ segir Skúli Jónsson, aðstoðaryfirlögregluþjónn hjá lögreglunni, við DV um málið.

Skúli segir tilkynninguna hafa varðað ofbeldi ungmenna og að þrír drengir hefðu verið að slást.

„Það var talað um að einn haldi á skotvopni. Það er ekkert vitað hvort það sé alvöru eða ekki þannig að við erum að skoða það,“ segir Skúli.

Samkvæmt færslu í Facebook-hópi íbúa átti atvikið sér stað nærri Álfasteini. Ungmennin munu hafa farið hvert í sína áttina að átökunum loknum.