Ming Ting Mancel hyggst áfrýja tólf ára fangelsisdómi sem Héraðsdómur Reykjavíkur kvað upp yfir henni fyrir manndráp og brot í nánu sambandi. Þetta kemur fram í frétt Vísis.
„Þetta eru vonbrigði. Þetta er þyngri dómur en hún átti von á og hún hefur tekið ákvörðun um að fela mér að áfrýja málinu,“ segir verjandi hennar, Ómar Örn Bjarnþórsson, í samtali við fréttastofu Sýnar.
Ming Ting var sakfelld fyrir að hafa, ásamt eiginmanni sínum, orðið 29 ára gamalli dóttur þeirra að bana á hótelherbergi á Edition-hótelinu í Reykjavík.
Ómar segir að hann eigi enn eftir að fara yfir forsendur dómsins, meðal annars hvort sakfellingin byggi á samverknaði eða hlutdeild.
Þegar dómurinn var kveðinn upp rann farbann yfir Ming Ting út og er hún því frjáls ferða sinna. Hún sat áður í gæsluvarðhaldi í um tvo og hálfan mánuð en var síðan í farbanni fram að dómsuppkvaðningu. Verjandinn segir að ekki sé ólíklegt að krafist verði gæsluvarðhalds á meðan áfrýjunarfrestur stendur.
