Gauti B. Eggertsson, prófessor í hagfræði, stendur framarlega í fylkingu þeirra sem vilja nánara samstarf við Evrópusambandið. Hann glímir við óþol gagnvart Stefáni E. Stefánssyni, blaðamanni á Morgunblaðinu, eins og fleiri. Gauti hæddist að Stefáni á Facebook-síðu sinni á dögunum og segist hafa átt í „orðaskiptum við þennan andans mann“ sem hafi verið í miklum ham. „Mér skilst að hann sé mikill spaði á Morgunblaðinu hvar hann rekur heimsfrægt hlaðvarp,“ skrifar Gauti. Almennt segist hann telja að Stefán sé misskilinn snillingur og því orti hann þetta kvæði:

Fræðir andann, hvergi hann
hræðir væna lýði.
Græðir landann, aldrei ann
örgu hræðslu níði.

Gauti segir að menn skilji ekki að þetta sé hin rétta vísa en Morgunblaðið virðist stundum vera á hvolfi og fólk slysist þá til þess að lesa kvæðið afturábak, sem sé auðvitað afskaplega villandi. Hann birtir svo seinni hluta öfugmælavísunnar.

Níði hræðslu örgu ann,
aldrei landann græðir,
lýði væna hræðir hann,
hvergi andann fræðir.

Gauti uppskar mikil viðbrögð við færslunni. Í athugasemdakerfinu upphófst eins konar me too-bylgja þar sem hver um annan þveran lýsti því að umræddur Stefán hefði blokkað sig á Facebook. Á meðal hinna forsmáðu er leiklistarrýnirinn Jón Viðar Jónsson sem er utangarðs hjá Moggamanninum ...