Helga Vala Helgadóttir, lögmaður og fyrrverandi þingkona Samfylkingarinnar, gagnrýnir harðlega ummæli Heiðrúnar Lindar Marteinsdóttur, framkvæmdastjóra Samtaka fyrirtækja í sjávarútvegi, um að óvissa vegna mögulegra aðildarviðræðna Íslands að Evrópusambandinu sé farin að hafa áhrif á fjárfestingar í greininni.
Í færslu á Facebook segir Helga Vala að fullyrðingar Heiðrúnar Lindar, sem hún lét falla í Bítinu á Bylgjunni, standist ekki.
„Nei nú verður að stöðva vitleysuna,“ skrifar Helga Vala og vísar til þess að Heiðrún Lind hafi haldið því fram að sjávarútvegsfyrirtæki fresti nú fjárfestingum og endurnýjun fiskiskipa vegna óvissu um hugsanlegar aðildarviðræður við Evrópusambandið.
Helga Vala hafnar því að sameiginleg sjávarútvegsstefna Evrópusambandsins feli í sér ógn við íslenskan sjávarútveg.
„Sjávarútvegsstefna ESB gengur ekki út á að knésetja sjávarútveginn innan aðildarríkjanna. Ekki frekar en að það sé stefna ESB að knésetja annan iðnað,“ segir hún.
Hún bendir á að markmið stefnunnar séu verðmætasköpun og vernd fiskistofna gegn ofveiði og segir hana að mörgu leyti svipaða því fyrirkomulagi sem þegar sé við lýði hér á landi.
„Stefnan er ekki ólík því sem þekkist hér. Farið er eftir vísindarannsóknum, sem Hafró sinnir og mun sinna áfram. Farið er eftir veiðireynslu á staðbundnum fiskistofnum, sem engin erlend ríki hafa hér, og svo er úthlutað úr flökkustofnum eftir ákveðnum leikreglum sem við höfum sterka stöðu í, einmitt vegna sérstöðu okkar,“ skrifar hún.
Helga Vala segir jafnframt að lítið sé rætt um þau tækifæri sem aðild gæti skapað fyrir útflutning sjávarafurða.
„Þar að auki þá mun opnast 450 milljón manna markaður neytenda á vörunni, hágæðavöru í verkuðum sjávarafurðum sem ekki mun lengur bera tolla. Einhverra hluta vegna minnist enginn á þá breytingu.“
Að hennar mati myndi slíkt kalla á aukna fiskvinnslu hér á landi með meiri verðmætasköpun og fleiri störfum.
Í lok færslunnar segir Helga Vala að kosningarnar 29. ágúst snúist fyrst og fremst um hvort hefja eigi aðildarviðræður, en ekki um að ganga sjálfkrafa í Evrópusambandið.
„Fyrst og síðast snúast kosningar 29. ágúst um að fá að sjá samning sem verður svo borinn undir þjóðina. Það gerist ekkert fyrr en þjóðin hefur sagt sína skoðun á aðild, byggða á skoðun á samningi – ekki byggða á skoðun fólks á hvað gæti kannski staðið í mögulegum samningi ef af honum verður.“
