Bandaríski rabbíninn og fjölmiðlamaðurinn Shmuley Boteach er enn á ferðalagi um Ísland ásamt syni sínum, hermanninum Mendy en hann þjónaði Ísraelsher bæði á Gaza og í Líbanon en Mannlíf sagði frá heimsókn feðganna á dögunum. Samkvæmt myndskeiðum sem hann hefur birt virðist ferðin meðal annars tengjast gerð heimildarefnis.
Myndband sem Boteach birti á samfélagsmiðlum sínum, er nú á dreifingu en þar sést hann öskra nær stanslaust á ungt íslenskt par á Akureyri og saka þau um gyðingahatur. Rabbíninn er einn þekktasti stuðningsmaður Ísraels og Ísraelshers í Bandaríkjunum.
Í myndbandinu sést rabbíninn veitast að parinu sem er á göngu í miðbæ Akureyrar. Boteach sakar manninn, Samúel Guðmundsson, um að hafa þóst vera aðdáandi hans þar sem hann var að taka upp myndband og síðan sagt „Fjandinn hirði Ísrael (Fuck Israel)“. Þessu játar Samúel. Rabbíninn sakar þá Samúel um gyðingahatur og hótar lögreglunni og bandaríska sendiráðinu á hann. Samúel heldur ró sinni allan tímann en harðneitar að hann hafi sagt nokkuð um gyðinga, heldur sé hann á móti Ísrael og þjóðarmorðinu á Gaza. Endurtekur hann orð sín ítrekað í myndskeiðinu: „Fuck Israel“.
Þó svo að Samúel haldi ró sinni er augljóst á myndbandinu að kærustu Samúels þykir afar óþægilegt að vera í mynd á meðan rabbíninn heyrist ítrekað hrópa á parið .
Í myndbandinu, sem er rúmlega átta mínútur að lengd, má heyra rabbínan afar æstan eins og áður hefur komið fram en í lok myndbandsins vísar Boteach til veru bandaríska hersins á Íslandi í síðari heimsstyrjöldinni og segir Íslendinga eiga Bandaríkjamönnum þakkir að færa fyrir að hafa verndað landið gegn nasistum.
Engir eftirmálar
Mannlíf heyrði í Samúel sem lýsti atvikinu á eftirfarandi hátt:
„Ég og kærasta mín vorum í fríi á Akureyri og vorum úti að labba eftir kvöldmatinn. Ég sé Shmuley fyrir algjöra tilviljun fyrir framan bar með IDF-liða syni sínum. Ég hafði nefnilega áður séð frétt frá ykkur að hann væri á landinu, þannig að ég var handviss um að þetta væri maðurinn. Ég tók kærustu mína afsíðis örstutt til að útskýra í stuttu máli það sem þessi maður stæði fyrir og væri ábyrgur fyrir. Ég sagði svo að ég myndi ekki geta lifað með sjálfum mér ef ég léti þetta ósagt og fór og talaði við hann. Ég tók upp myndband af fyrstu kynnunum þarna, hann sagðist vera í símanum við lögfræðing en samþykkti að vera með því ég sagðist vera aðdáandi. Um leið og hann var kominn á filmuna brosti ég og sagði „fuck Israel“ og svo „welcome to Iceland“. Eftir þetta elta þeir feðgar okkur upp um allar trissur og götur þarna, og það lágkúrulegasta er að þeir elta kærustu mína sem átti enga sök frekar en mig. Þeir settu strax orð í munn og ásökuðu mig meira að segja að hafa sett handlegginn utan um hann, en eins og sést á myndbandinu kom ég aldrei við hann. Hann aftur á móti reyndi ítrekað að labba utan í mig þegar hann var að elta kærustu mína. Ég er alls ekki hissa á þessari hegðun þeirra, hef séð önnur myndbönd þar sem menn ósáttir með þjóðarmorðið á Gaza láta hann heyra það. Hann hótaði mér löggunni og öllu illu.“
Að sögn Samúels urðu engir eftirmálar á þessu enda hafi sonur rabbínans vilja fara og bætti við: „Ég hélt kúlinu allan tímann, sem var ábyggilega öfugt við það sem þeir vildu.“
Hér má sjá myndskeiðið sem rabbíninn birti:
Athugasemdir