Ragnar Þór Ingólfsson, félags- og húsnæðismálaráðherra, hefur skipað fyrstu raflínunefndina á Íslandi. Nefndin mun fjalla um Holtavörðuheiðarlínu 1 og er skipunin í samræmi við ákvörðun ráðherra frá 14. nóvember síðastliðnum.

Raflínunefndin er skipuð á grundvelli ákvæða skipulagslaga frá árinu 2023. Markmið með slíku fyrirkomulagi er að brúa ágreining og stuðla að því að stórar framkvæmdir, sem varða mikilvæga þjóðarhagsmuni, geti gengið fram með málefnalegum og skilvirkum hætti.

Hlutverk nefndarinnar er meðal annars að undirbúa, kynna og afgreiða raflínuskipulag vegna framkvæmda í flutningskerfi raforku sem ná yfir tvö eða fleiri sveitarfélög.

Þá er nefndinni ætlað að veita framkvæmdaleyfi vegna framkvæmda í flutningskerfi raforku sem byggjast á samþykktri kerfisáætlun. Jafnframt mun hún hafa eftirlit með framkvæmdum í flutningskerfinu og framkvæmd raflínuskipulags.

Gissur Pétursson hefur verið skipaður formaður raflínunefndarinnar. Auk hans eiga fulltrúar Borgarbyggðar, Húnaþings vestra, Hvalfjarðarsveitar og umhverfis-, orku- og loftslagsráðuneytis sæti í nefndinni.