Matvælastofnun (MAST) rannsakar nú hvað olli dauða rúmlega 30 súlna sem fundist hafa á undanförnum dögum á Vopnafirði. Ein helsta tilgátan er að fuglarnir hafi verið með fuglaflensu, en ekki er þó útilokað að aðrar ástæður liggi að baki.

Brigitte Brugger, fuglasérfræðingur hjá MAST, segir í samtali við Austurfrétt, fjöldann á tiltölulega litlu svæði gefa til kynna að skæður vírus gæti verið um að ræða. Hún vill þó bíða niðurstöðu sýnatöku áður en hægt verði að fullyrða nokkuð. Brugger bendir á að síðsumar og haust sé sérstaklega viðkvæmt tímabil, þar sem margir ungfuglar eru á ferðinni, þeir séu almennt mun berskjaldaðri gagnvart sýkingum en eldri fuglar.

„Það er búið að taka sýni og koma til rannsóknarstofu til að ganga úr skugga um hvað þarna sé á ferðinni. Ég á von á að við fáum skýr svör um orsakirnar síðar í þessari viku eða snemma í þeirri næstu. Þó fuglaflensu hafi ekki orðið vart nú um nokkurt skeið er þessi tími mikilvægur sökum ungfuglanna sem flögra um en þeir eru mun viðkvæmari fyrir hvers kyns sjúkdómum. Þess vegna erum við sérstaklega á varðbergi á þessum tíma og ég vil endilega biðja fólk um að hafa samband við okkur ef vart verður við dauða fugla um þessar mundir.“

Síðast barst MAST tilkynning um óvenjulegan fugladauða fyrir rúmum mánuði, þegar fjöldi dúfna fannst dauður í Vestmannaeyjum. Þar reyndist þó ekki um fuglaflensu að ræða.

Þrátt fyrir það er fuglaflensan enn útbreidd víða í Evrópu. Frá Noregi til Spánar hafa verið gefnar út viðvaranir vegna þessarar hættulegu pestar.