Karlmaður á þrítugsaldri hefur verið ákærður fyrir tilraun til fíkniefnalagabrots.

Hann er sagður hafa fimmtudaginn 19. desember 2024, sótt og gert tilraun til að taka við tveimur póstsendingum sem innihéldu alls 2.486,7 g af maríhúana, en annars vegar hafði komið póstsending til Íslands þann 3. desember 2024 sem innihélt 996,7 g af maríhúana og hins vegar póstsending sem kom til Íslands þann 18. desember 2024 og innihélt 1.490 g af maríhúana. Lögregla lagði hald á fíkniefnin í póstmiðstöðinni að Stórhöfða 32 í Reykjavík og skipti þeim út fyrir gerviefni.

Maðurinn sótti póstsendingarnar í póstmiðstöðina að Stórhöfða þann 19. desember 2024 og veitti þeim viðtöku og gekk með þær út á bifreiðastæði við póstmiðstöðina þar sem hann var handtekinn.

Þess er krafist að maðurinn verði dæmdur til refsingar og til greiðslu alls sakarkostnaðar.

Málið verður tekið fyrir í Héraðsdómi Reykjavíkur 10. mars.