Um 10.500 börn á Íslandi bjuggu á heimilum undir lágtekjumörkum árið 2024, eða 12,6% barna. Hlutfallið hefur lækkað frá árinu 2000 þegar það var 16,5%. Þá bjuggu 5,1% barna við varanlega fátækt árið 2024.
Þetta kemur fram í nýrri skýrslu um fátækt barna og stöðu barnafjölskyldna sem unnin var fyrir forsætisráðuneytið. Staðan hér á landi er í meginatriðum sambærileg við Noreg, Finnland og Danmörku.
Mikill munur er þó eftir fjölskyldugerð og bakgrunni. Um 30% barna einstæðra foreldra búa við fátækt en hlutfallið er um 8% meðal barna sem búa með tveimur foreldrum. Menntun foreldra hefur einnig sterk tengsl við stöðu barna.
Staða barna af erlendum uppruna vekur sérstaka athygli. Fátæktarhlutfall barna sem fædd eru erlendis og eiga tvo foreldra af erlendum uppruna hækkaði úr 23% árið 2000 í 33,6% árið 2024.
Barnabætur og húsnæðisbætur draga verulega úr barnafátækt. Barnabætur lækkuðu lágtekjuhlutfall barna um rúm 23% árið 2024 og ásamt húsnæðisbótum um rúm 26%.
Skýrsluhöfundar leggja meðal annars til heildstæða endurskoðun stuðningskerfis barnafjölskyldna og að sérstaklega verði hugað að þeim hópum sem standa verst að vígi.
