Sameinuðu arabísku furstadæmin tilkynntu í dag að þau hefðu sagt sig úr bæði OPEC og OPEC+, sem talið er þungt högg fyrir olíuútflutningsríkin á sama tíma og stríðið við Íran hefur valdið sögulegu áfalli á orkumörkuðum og skapað óvissu í heimshagkerfinu.
Olíuríki við Persaflóa hafa þegar átt í erfiðleikum með að flytja út olíu um Hormuz-sund, þröngt siglingasvæði milli Írans og Óman, þar sem um fimmtungur af hráolíu og fljótandi jarðgasi heims fer venjulega um. Ástæðan eru hótanir og árásir Írans á skip á svæðinu.
Forseti Bandaríkjanna, Donald Trump, hefur sakað OPEC um að „svíkja restina af heiminum“ með því að halda olíuverði háu. Hann hefur einnig tengt hernaðarstuðning Bandaríkjanna við Persaflóaríki við olíuverð og sagt að ríkin „nýti sér verndina með því að halda olíuverði háu“.
Ákvörðunin kemur í kjölfar þess að stjórnvöld í Sameinuðu arabísku furstadæmunum gagnrýndu önnur arabaríki fyrir að gera ekki nóg til að verja þau gegn ítrekuðum árásum Írans í stríðinu.
Diplómatískur ráðgjafi forseta landsins, Anwar Gargash, gagnrýndi viðbrögð araba- og Persaflóaríkja á fundi Gulf Influencers Forum á mánudag.
