Atli Þór Fanndal Guðlaugsson, verkefnastjóri á skrifstofu rektors við Bifröst, gagnrýnir Miðflokkinn harðlega í Facebook-færslu þar sem hann segir flokkinn ala á ótta og tortryggni í samfélaginu og að nú sé kominn nýr óvinur til að óttast, Reykjavík.
Í færslunni, þar sem hann birtir tvö TikTok-myndskeið frá Miðflokknum, segir Atli að flokkurinn hlaði „í ótta og haldi áfram að skilgreina óvini og kenna fólki að vantreysta nágrannanum“.
Hann gagnrýnir sérstaklega orðræðu um svokallaða „Reykjavíkurvæðingu“ og segir hana vera dæmi um hvernig ótti sé notaður í pólitískum tilgangi. „Nú þurfa íbúar á höfuðborgarsvæðinu að óttast „reykjavíkurvæðingu“ svona eins og Reykvíkingar séu að skipuleggja yfirtöku eða séu sinubruni,“ skrifar hann.
Þá telur hann upp fleiri málefni sem Miðflokkurinn noti til að sá ótta í kjósendur:
„Allt snýst um að ala á ótta. Opin landamæri hælisleitendur. Hinsegin. REYKJAVÍK!!!! Þvílík smámenni. Það er enginn endir á óvinum hjá svona gremjuliði.“
Atli segir slíka nálgun ekki fela í sér raunverulegar lausnir. „Aldrei lausnir, bara vantraust og tuð,“ skrifar hann að lokum.
Athugasemdir