Í gær var tilkynnt um að Íslandi muni taka þátt í máli Suður-Afríku gegn Ísrael fyrir Alþjóðadómstólnum í Haag.

Í málinu fer Suður-Afríka fram á að Ísrael verði dæmt brotlegt við skyldur sínar samkvæmt hópmorðssáttmála Sameinuðu þjóðanna fyrir framgöngu sína í stríðinu á Gaza, sem hófst í kjölfar árása hryðjuverkasamtakanna Hamas í Ísrael 7. október 2023.

Sigmundur Davíð Gunnlaugsson, formaður Miðflokksins, er allt annað en sáttur með þátttöku Íslands í því máli.

„Ég hefði ekkert á móti því að Íslendingar legðu sitt af mörkum til að rannsaka hugsanlega stríðsglæpi og refsa fyrir þá. Þetta snýst um fullyrðingar um að Ísraelar hafi ætlað sér að fremja helför, þjóðarmorð,“ sagði Sigmundur Davíð við Vísi.

„Hafi sú verið raunin, þá hefur þeim gengið afskaplega illa með það og maður veit ekki alveg af hverju þeir eru að senda út viðvaranir og reyna að hlífa almennum borgurum ef að það var markmiðið.“

Ráðgjafinn og hlaðvarpsþáttastjórnandinn Andrés Jónsson greinir frá því á Twitter að hann telji orð Sigmundar skelfileg.

„Vona að þetta hafi verið hugsunarlaus ummæli. Ef ekki þá er þetta það ljótasta sem ég hef heyrt nokkurn íslenskan stjórnmálamann segja.“

Sigmundur Davíð ákvað svo að svara Andrési.

„Það hvarflar ekki að mér að halda því fram að Andrés Jónsson sé heimskur maður. Fyrir vikið verð ég að álykta að hann geri sér það upp í pólitískum tilgangi. Ég vona að hann ráðleggi ekki skjólstæðingum sínum og pólitískum samherjum að gera slíkt hið sama. Það myndi þó skýra ýmislegt ef sú er raunin.“